港聞

港聞二

【Emily】國泰供應竹篙灣膳食 每餐4款揀 林健鋒話媲美茶記 衛署拒講價錢

【明報專訊】竹篙灣檢疫中心提供嘅膳食被指「劣食」,經民聯立法會議員林健鋒話,國泰由噚日開始向竹篙灣檢疫中心提供膳食,而據佢了解,𠵱家隔離營住咗百幾人,國泰會提供一日三餐,每日會盡量做到唔同款式。林健鋒噚日試食,話食物夠熱,以飛機餐標準會畀90幾分。

國泰噚日送咗4個餐去立法會,包括「泰式咖喱魚粒拼豆腐肉碎配白飯」、「蘑菇茄汁燒雞腿肉配牛油麵」、「西芹冬菇紹菜炒甘筍配玉子豆腐」、「瑤柱白粥配肉碎炆豆腐」等。林健鋒即場試食後話睇得又食得,味道媲美茶餐廳,希望國泰可以保持水準。

質疑價低者得 林健鋒批政府食古不化

林健鋒話,之前見隔離營嘅食物咁劣評,令佢好唔開心,話既然國泰咁近竹篙灣,做咩唔搵國泰做?作為行會成員嘅林健鋒亦批評, 「點解一定要價低者得,政府唔應該食古不化」。佢又話唔期望隔離營食物好似飛機餐咁豐富,但就認為國泰出品有一定保證,至少提供到熱飯畀大家食,亦唔會係「劣食」。

衛生署回覆查詢時,證實國泰航空飲食服務(香港)有限公司噚日起為竹篙灣檢疫中心檢疫者提供膳食,但拒透露合約內容同價格,話以免影響政府議價能力。國泰就話,每日3餐膳食各提供4款菜式供選擇,合共12款,確保膳食健康同營養均衡。

相關字詞﹕國泰航空 竹篙灣檢疫中心

上 / 下一篇新聞