港聞

港聞二

【Emily】羅致光話社福界流傳common nonsense

【明報專訊】勞工及福利局長羅致光嘅言論一向惹火,佢噚日發表網誌話,約一個星期前,出席社聯、社署合辦嘅福利議題及優次會議,指有啲評論令自己感到唏噓,因為評論者唔了解何謂社福規劃,更唔認識歷史事實,批評係「人云亦云,以訛傳訛」。羅局長更喺文末話,「Common sense(常識)有多普及我不知道,不過坊間卻流傳了不少common nonsense(普遍嘅謬論)。」

羅致光撰文講社福規劃工作,話有唔少社福界人士,希望政府恢復1990年代及以前嘅規劃,佢話已經唔想重複解釋,但希望嗰啲從來冇參與過30年前規劃工作嘅人,先去了解再評論,重申現時社福開支已大增,舉例1991/92年度,社署財政預算開支係55.2億元,至2021/22年度係1042.7億元。

「我和大家都可能疏於求證」

羅致光話,只要大家唔係單憑感覺或者依賴唔太可靠嘅記憶,而着重事實根據,就唔會受傳言誤導,「不過,我又明白,求真是要時間的,疏於求證,是我和大家都可能會犯上的毛病」。

相關字詞﹕社會福利 羅致光 勞工及福利局

上 / 下一篇新聞