港聞

港聞二

【Emily】60人36℃下參加發呆比賽

【明報專訊】噚日氣溫最高超過36℃,青協賽馬會青年藝術教育計劃喺西九文化區草坪辦發呆比賽,原定有100名14至35歲嘅參賽者,最終60人出席。佢哋比賽時要坐喺瑜伽墊上,用舒適嘅姿勢進入發呆狀態,不過噚日暴曬下,部分人就以瑜伽墊遮頭擋太陽,亦有唔少人擔遮防曬,唔知喺又熱又曬下,參賽者有無「心靜自然涼」?

發呆比賽參加者要喺60分鐘內保持平穩心率,工作人員每15分鐘為佢哋量度心跳,由裁判裁定心率最低最平穩嘅參賽者為冠軍;比賽期間瞓覺、用電話、講嘢或大幅度移動,都會被視作違規。主辦單位話,活動希望推廣另類調適壓力嘅方法,透過大腦放空,暫時拋開煩憂,得到真正休息。冠軍參賽者就話,噚日有微風,唔算太辛苦,一個鐘好快過,相信自己勝出係因為平時心率都較低。

相關字詞﹕發呆 西九文化區

上 / 下一篇新聞