港聞

港聞二

【Emily】孫仔寫信畀何俊仁:知你好熱 要加油!

【明報專訊】近日天氣熱,監獄尤甚,一眾在囚者嘅情况就更令人關注。民主黨前主席何俊仁因前年「10.1遊行案」認罪而還押候判,屯門區議員朱順雅去探佢,形容仁哥講幾分鐘就開始額頭冒汗,甚至汗流披面;不過安排到比較通風嘅囚室,瞓得較好。另外,仁哥嘅孫仔「大B」特意寫信(圖)畀佢話好掛住公公,希望快啲見到公公,又話知道仁哥現時生活好悶、好熱,叫佢要加油,「我們會好好照顧婆婆,不用擔心」。

鄒家成:日冲兩次涼其實好幸福

因民主派立選初選案還押嘅鄒家成,其fb小編探佢時,就引述佢指倉內得一把風扇,每日只能冲一次涼,令佢慨嘆「一日可以冲兩次涼其實真係好幸福」。

立法會前議員邵家臻日前發起「十萬。火急。行動」,喺33小時內收集到10萬人網上簽名,盼懲教署以人道理由,採用各種紓緩酷熱問題嘅方法。阿臻話,將會聯同前議員張超雄、關注囚權團體去信懲教署長要求會面,佢質疑署方一直「冷處理」問題,「究竟(家屬向在囚者提供)退熱貼如何影響監房秩序?飲凍水如何增加行政負擔?多冲一次涼如何消耗資源?」Emily曾向懲教署查詢署長會否應約,署方回覆話「沒有補充」。

相關字詞﹕在囚人士 何俊仁 民主派初選 邵家臻 民主黨

上 / 下一篇新聞