港聞

港聞二

【Emily】宣誓例今生效 兩區議員辭職 朱凱廸結束新西團隊不再參政

【明報專訊】要求區議員宣誓嘅《2021年公職(參選及任職)(雜項修訂)條例》今日刊憲生效。特首林鄭月娥噚日簽署條例,話今次為公職人員嘅宣誓首次訂立非常明確嘅法定標準,為「愛國者治港」原則踏出重要一步。去年《港區國安法》及《國歌條例》刊憲前夕,政府都有就林太簽署法例出稿。

沙田丁仕元:未能暢所欲言發聲

再有區議員喺條例生效前辭職。沙田區議員丁仕元噚日宣布辭職,話喺目前嘅政治制度下,出任區議員已唔能夠暢所欲言為市民發聲,佢亦唔想屋企人終日活喺惶恐之中,今後將以普通市民身分尋找新生活。中西區區議員何致宏亦打算辭職,佢助理同Emily講,何致宏評估風險後唔打算宣誓,但暫時未決定幾時遞信,其間辦事處會繼續運作。

另外,立法會前議員朱凱廸因民主派立選初選案正還押,佢噚日宣布決定結束「朱凱廸新界西團隊」,話目前有6宗刑事檢控纏身,包括被控違反《港區國安法》,相信自己將有一段長時間失去自由,之後亦唔會再參政。阿廸話「不會忘記與各位戰友一起奮鬥的美好時光,祝大家平安」。

劉澤鋒退出政界

澄清無叫王進洋留任

另一初選案被告劉澤鋒噚日透過立法會前議員邵家臻發出聲明,話自己已決定退出政界,唔參與政治活動,亦無講過支持離島區議員王進洋留任。

相關字詞﹕區議員宣誓 民主派初選案 朱凱迪

上 / 下一篇新聞