港聞

港聞二

【Emily】文遠阿人鐵窗內外同「為鄰」 陳皓桓早睡早起 話「小強」較多

【明報專訊】社民連吳文遠因前年10‧1遊行案連同9名民主派被控,前日起還押候判。吳文遠嘅facebook小編噚日去探監,文遠話社民連成員梁國雄(長毛)、岑子杰、陳皓桓、謝寄安都喺荔枝角收押所,遲啲另外兩名成員黃浩銘及曾健成(阿牛)都有好大可能要入獄,「到時大家真係可以喺監倉開會」。

支聯會主席李卓人因未經批准集結案𠵱家喺荔枝角坐緊監。文遠話以前同李卓人喺美孚新邨做街坊,𠵱家就喺收押所做「鄰居」,「大家都有傾談,上至天文,下至地理,無所不談」。

多名民主黨前主席及副主席都身在獄中,包括胡志偉、楊森、林卓廷、尹兆堅,文遠話「愈數就愈感到悲哀,到底要一個點樣嘅社會先至會令所有對社會有貢獻嘅人,同有抱負嘅年青人都困晒喺監獄」。

趙家賢申請睇眼科

陳皓桓嘅小編探完佢後亦喺fb更新,話陳精神好好,之前一晚早睡早起,「但曱甴就真係多咗啲」,而陳暫未有報紙睇比較悶,所以係咁做運動。

民主黨趙家賢因民主派立選初選案正還押,噚日有黨友去探佢,趙家賢瘦咗好多,因健康問題需要食糖尿餐單,佢笑笑口話啲米好難食,所以減磅唔少。趙家賢繼續有偏頭痛,左眼睇嘢唔太清楚,申請緊去睇眼科醫生;佢聽到民主黨前輩還押嘅消息後覺得好心痛,希望佢哋撐住。

相關字詞﹕未經批准集結 李卓人 吳文遠

上 / 下一篇新聞