港聞

港聞二

【Emily】「賞你遊」再嚟 消費換免費本地團 使夠800元參加一次

【明報專訊】新冠病毒疫情重挫旅遊業,旅遊發展局總幹事程鼎一話,未來兩星期會推出第二輪「賞你遊」活動,仲呼籲市民打疫苗,因為疫後旅客揀地方旅行可能都會睇當地係咪已經有群體免疫。Emily之前聽過第二輪「賞你遊」活動,市民本地消費滿800元,就可免費參加一次本地團,名額2萬個。

旅發局噚日舉行網上年度業界簡報會,旅發局主席彭耀佳話,日後恢復跨境旅遊時,相信旅客會偏向逗留耐啲、更深度旅遊。佢仲話大灣區市場係一大機遇,亦係重建跨境遊嘅重要部分,而現階段香港最重要係有多啲人打疫苗,快啲達到群體免疫。國泰航空顧客董事羅世民喺會上話,打疫苗將會係未來出行旅遊關鍵,國泰有超過八成機師、近五成機組人員已打針。

上月訪港旅客5700人

按年升38.3%

另外,旅發局公布4月初步訪港旅客有約5700人,按年升38.3%,主要係因為上年同期基數低,而今年頭4個月訪港客有1.57萬人,按年下跌99.4%。

上 / 下一篇新聞