港聞

港聞二

【Emily】鄧飛話一人一票要同智商 校友阿廷:理論何來?

【明報專訊】教聯會副主席鄧飛日前發表對民主選舉嘅評論,講到一人一票嘅其中一個假設,係人人要智商一樣。因民主派立選初選案還押嘅民主黨林卓廷(圖),喺獄中都忍唔住出聲,原來佢同鄧飛同屬中大政政系校友。阿廷話:「政政系都做唔到人人智商一樣啦!除咗鄧飛,建制仲有陳克勤、梁美芬都係中大政政,佢哋可能智商一樣,都係忠誠的乜乜物物,但我哋赤柱𠵱家都有三個中大政政,區諾軒、岑敖暉,肯定就高攀唔起!」

傳媒人李慧玲噚日去赤柱探阿廷,話阿廷一見到佢就提及鄧飛,仲叫李慧玲幫手問問鄧飛,「叫佢話畀大家知呢種民主理論究竟來自邊門邊派邊位民主大師?等我呢啲在囚人士都學吓新嘢!」

公開信談移民潮 劉頴匡望港人勇敢留低

同案嘅劉頴匡就寫公開信談移民潮,提及自己受囚捱苦,但希望自己受嘅苦難,可成為港人勇敢地堅持留低嘅理由,「如果香港再冇香港人,我哋為咩而坐監?」佢又寄語支持者,如果話唔知留喺度有咩可以做,不如一齊努力抵抗移民潮,話呢個係每個人嘅當務之急。佢認為自己已盡力兌現「齊上齊落」嘅承諾,最大心願係將來出獄仍然可以見到心愛同熟悉嘅香港。

相關字詞﹕劉頴匡 民主派初選案 35+大搜捕 林卓廷 赤柱監獄

上 / 下一篇新聞