港聞

港聞二

【Emily】兩區議員辭職 姚躍生:以曾為民選議員為榮

【明報專訊】立法會上周三通過公職人員宣誓條例,區議員嘅辭職潮仲未完,噚日再多兩個區議員喺facebook宣布辭職,包括大埔區議員姚躍生及觀塘區議員陳嘉言。

姚躍生話,佢辭職即日生效,形容自己上任以來壓力倍增,休息時間大減,近日身體同精神狀態都出現問題,且每况愈下,令佢無法繼續做區議員。佢話要為未能完成任期而向康樂園選區街坊道歉,自己將「永遠以曾經身為香港人嘅民選議員為榮」。

陳嘉言就話,因宣誓法例帶來嘅不明朗前景而請辭,5月31日為任期最後一日,佢對未能完成4年任期表示歉意,話辭職後會回歸普通人嘅生活,離開公衆視線,但會堅持憑良心處事,「對身邊的人和環境好一點,相信這也是每個人能做到的事」。

早前因身體理由辭任觀塘區議員嘅畢東尼,噚日喺facebook話做完手術留院整整一周後終於出院,感謝醫護照顧。其fb又出帖,話因議辦月尾關門,為免浪費,議辦物資希望街坊「認領」,包括多把雨傘、大量文具及家俬等。

相關字詞﹕辭職 宣誓 區議員

上 / 下一篇新聞