港聞

港聞二

【Emily】fb貼連桷璋黑板相 譚爾培:永遠尊敬辭任同事

【明報專訊】多名民主派議員趕喺宣誓前辭職,大埔區有3人請辭,包括原任廣福及寶湖區議員嘅連桷璋。大埔西貢北議員譚爾培噚日喺facebook上載相片,相中連桷璋企喺一塊寫滿字嘅黑板前,當時係大埔區議員聚首一堂討論大埔計劃,呢塊黑板係議員辦事處嘅一幅牆,由一次活動到長遠政策,交通、經濟、環保、運動,連桷璋解釋黑板上各項計劃,睇得出花咗好多心思製作。

譚爾培話,每次搞活動都自愧才幹同毅力不及呢啲已離開嘅議員,慨嘆「到底香港為甚麼要被逼失去這些柱樑?」佢話雖然議員辦事處要結業,「但我不認為他們已經放棄了這塊黑板,即使不再擁有那個身分,他們還是會想辦法將香港變成理想中的模樣」。佢話3個辭任議員者,永遠係佢尊敬嘅區議會同事。

司徒博文辭職:繼續關注地區

另外,元朗十八鄉西區議員司徒博文噚日喺fb宣布辭職,任期至本月。司徒博文對未能完成任期感到抱歉,話以曾為港人嘅議員為榮,fb專頁將會改名,繼續關注該區嘅地區事務、連結該區同路人。

政府噚日公告兩個中西區議席懸空,有關議席原屬民主黨吳兆康,同民主派初選案被告、正還押嘅梁晃維。

相關字詞﹕元朗區議會 大埔區議會 區議員宣誓

上 / 下一篇新聞