港聞

港聞二

【Emily】社民連暑期實習招募開始 「做到繼續做」

【明報專訊】每年暑期之前幾個月,各大政黨都會推出暑假實習計劃招募,噚日社民連就喺facebook出帖,招募理念與社民連相近嘅大專學生參加。實習日期係今年6月至8月,工作地點係社民連總部(荔枝角)及區議員地區辦事處(柴灣),工作內容包括地區工作、政策研究同行動策劃,至少每星期6節,每節約4個鐘。

實習計劃今個月23日截止報名,有興趣者可以將個人履歷及聯絡方法,連同一篇唔少於200字嘅文章講述對香港青年未來出路看法,電郵畀社民連。個post無講有冇人工,Emily問過負責計劃嘅社民連常委辛浩銘,佢話會有車費津貼畀參與者。佢話,都係前一晚先決定繼續搞實習計劃,因為𠵱家仲有好多年輕人關心時事,希望喺呢個民主運動低潮期繼續培訓下一代,可以做到就繼續做。

另外,由香港基本法推介聯席會議主辦嘅「第18屆基本法大使培訓計劃」亦都接受報名,對象係中二至中六年級學生,名額100個,7月10日或之前要交報名表。計劃章程介紹活動包括:三日兩夜領袖訓練營、法律講座「港區國安法與我」等。參加者畀200元,就可以參加計劃入面嘅多個活動。

相關字詞﹕基本法大使 港區國安法 社民連 實習

上 / 下一篇新聞