港聞

港聞二

【Emily】伍健偉換夏季囚衣 戰友探監即曬「美腿」

【明報專訊】民主派立選初選案36人仍然還押,近日天氣炎熱,元朗區議員伍健偉嘅facebook小編講起佢嘅情况時,就話伍健偉換咗夏季衫,終於可以著短衫短褲,「一出嚟連電話都未拎起,第一時間就show咗條美腿比(畀)我哋睇」,又透露伍健偉開心陸續收到好多信,目前生活主要係睇書、寫信、畫畫、學日文同健身,仲特別鳴謝同為初選案被告嘅劉頴匡、梁晃維做「日文小老師」每日教佢。

伍健偉fb小編又引述佢話現時開始減肥,自言一日食三餐又少郁動,肥咗好多。佢寄語香港人要好好保護自己、多關心身邊親友近况,又話好多冇咁出名嘅手足需要大家關心,旁聽嘅支持唔可以停。

民主黨劉慧卿、袁海文噚日就一齊去探黨友尹兆堅,卿姐透露阿尹精神不俗,又話阿尹喺獄中需要《辭淵》字典,但因為懲教署唔接受硬皮書,所以字典送到佢手上時,硬皮封面、部首目錄要先拆除,難以正常查閱。阿尹收到時雖然氣餒,但就迅速應對,用一日時間睇晒所有部首頁數,重新自製部首目錄。

相關字詞﹕伍健偉 袁海文 劉慧卿 民主派初選 尹兆堅 區議員

上 / 下一篇新聞