港聞

港聞二

【Emily】政協胡定旭:劉慧卿參選必提名 讚民主黨「睇得到大局」

【明報專訊】民主黨前主席劉慧卿噚日喺其網台節目《議會內外》訪問全國政協常委胡定旭,談到立法會選舉改制。肥胡話卿姐係愛國之人,如果佢再次參選,「我即刻簽名(提名)畀你」,又讚卿姐有經驗、有遠見,「民主黨睇得到大局」。

肥胡:若卿姐薦年輕人 亦考慮提名

卿姐問肥胡,喺民主黨會唔會點名有人唔可以參選,肥胡回應話:「淨係點名你(參選)!」肥胡又話,如果卿姐推薦年輕人,亦會考慮提名,並希望有更多非建制派及年輕人參選立法會,令議會有多啲唔同聲音。至於唔會提名乜嘢人,肥胡就話唔會提名支持「港獨」及「攬炒」嘅人。Emily睇番之前報道,卿姐其實早前已經話泛民唔應該參選,覺得喺新選舉制度下須取得選委會五大界別提名,無咩尊嚴。

讚田飛龍言論「講得好中」

另外,卿姐提起全國港澳研究會理事田飛龍話建制派有「兩面人」,肥胡就話好欣賞田教授講嘅話,話佢講嘢係「有理由、講得好中」及「有獨特見地」。事後有記者問「忠誠廢物論」係指邊個,肥胡就答,「唔好叫我講邊個出嚟啦,我自己啦!」佢又話「相信有(忠誠廢物),邊個就唔知」,形容好多人可能幫倒忙、好心做壞事。

相關字詞﹕胡定旭 民主黨 劉慧卿

上 / 下一篇新聞