港聞

港聞二

【Emily】屯門防火會民主派無份 建制區選敗將獲委

【明報專訊】人大修改香港選舉制度後,地區分區委員會、滅罪會、防火會組成備受關注,因為可成為選委會選民。民政局噚日公布埋最後一區,即屯門新一任防火委員會名單,未見民主派嘅人。民主黨何杏梅、民協甄紹南上屆都係委員,今次被剔走,反而區選輸畀何杏梅嘅新民黨鄺珉樀獲委做委員。何杏梅接受Emily查詢時話,預咗冇得續任,形容現時嘅組成「完全冇反對意見」,基於防火委可以選選委,冇民主派係意料中事。

新任屯門防火會主席、新民黨甘文鋒就話,當局批評現時區議會失衡,若一邊話區會有問題,一邊委任泛民區議員,比較奇怪;又話現時委員會組成唔止得建制政黨,亦有好多地區人物,「反對派唔好認為,唔委任佢哋就係清一色」。

甘文鋒認為,獲委任防火會主席係對佢多年地區工作嘅認可。被問有冇興趣參選選委,佢話要先上任開會,等立法會通過條例、重新做選民登記再睇吓邊個有意思。

屯門防火會組成有5人係前年區選落敗者,除鄺珉樀外,仲包括甘文鋒,民建聯陳文華、葉俊遠,工聯會陳文偉。

相關字詞﹕防火委員會 分區委員會 修改香港選舉制度 新民黨

上 / 下一篇新聞