港聞

港聞二

【Emily】港人代擬考察新疆 田北辰想睇棉花廠

【明報專訊】港區全國人大代表每年都會有一次到內地視察,團長馬逢國同Emily講,成班港區人代由前年開始就表示想去新疆,但2019年因為反修例風暴、去年就因為疫情一直未能成行,今年大家意向無變,佢哋暫時屬意6月去,但疫情係最大變數。港區人代、立法會議員田北辰話,屆時行程有機會考察政治方面嘅嘢同睇新疆棉。

馬逢國:前年已想去

本身係時裝連鎖店老闆嘅田北辰話,想去睇新疆棉花廠運作,到底有冇剝削勞工情况;亦會睇吓政治方面嘅嘢,例如係咪如外間咁話對維吾爾人有「洗腦」。佢話視察預計要一星期,雖然意願係想參加,但都要睇吓立法會有咩議程,因為如果要去就要向立法會請假。佢強調出發日期未定,因為去到新疆考察難以封閉式管理咁隔離,所以疫情係最大未知數。

同樣身兼立法會議員嘅馬逢國強調,唔係因為近期炒熱咗新疆棉事件,所以港區人代想去新疆,而係過去兩年都想去,新疆係「一帶一路」重要接點,港區人代想了解當地經濟發展,棉花都係當地重要農業。佢話新疆天氣最好係8、9月,但9月有選委會選舉,所以大家屬意6月出發,日期未確定,暫未知有幾多人代報名。

相關字詞﹕再教育營 極端思想 新疆 西藏 新疆棉風波 港區全國人大代表

上 / 下一篇新聞