港聞

港聞二

【Emily】《議事論事》換題風波 林琳話一頭霧水

【明報專訊】港台《議事論事》節目安排日前惹嚟爭議,根據報道,4月29日一集節目原本題目係討論「假新聞」議題,但港台其後換題目。有傳媒引述消息話,節目原本邀請3個嘉賓討論,但港台管理層自行邀請民建聯成員、前荃灣區議員林琳加入討論,製作團隊最後決定該集轉題目。不過,林琳噚日同Emily講,對事件感到一頭霧水,因為從來無人搵過佢出席港台節目,唔明點解港台嘅事,要拉埋佢落水。

Emily嘅同事前日都有致電林琳手提電話同短訊留言,想搵佢回應港台一事,但未獲回應。林琳噚日就好激氣,喺facebook話前日自己電話長開,有其他記者都搵到佢,對於記者話搵唔到佢 「莫名其妙」。

話從來無人搵佢出席港台節目

Emily分別向林琳同埋同事了解,林琳話Emily同事前日致電嘅,喺佢辦事處嘅手提電話,平時有職員會處理,而前日係5.1公眾假期,辦事處未及處理。佢話記者行家一向係透過另一個同傳媒聯絡嘅電話直接搵到佢,而佢係會盡量回應。

上 / 下一篇新聞