港聞

港聞二

【Emily】水務署引入無人船 監測水塘水質

【明報專訊】水塘存水係香港重要嘅食水資源,水務署近年引入無人船,主要喺船灣淡水湖監測水質,確保食水安全,又可提升工作效率。

太陽能推動 抽水監測溫度渾濁度

發展局長黃偉綸噚日發表網誌,佢話創新科技係大勢所趨,樂見部門敢於創新,提升工作效率。水務署水務化驗師鄧浩維話,無人船以太陽能推動,系統由一個基站電腦同4艘電動無人船組成,每艘無人船嘅船艙設有取樣裝置,連接船底水管,直接將水抽進取樣箱,監測溫度、渾濁度、溶解氧同酸鹼值等;船上配備衛星導航接收器同自動避障系統,可以喺航行時避開障礙物。

鄧浩維話,透過基站電腦可遙控無人船按預設航道航行,並喺指定位置監測水質同取樣。4艘無人船一日之內可以監測面積12平方公里嘅船灣淡水湖;亦可以由一般技術人員操作,當遇到緊急事故,調配到唔同水塘。

展望未來,水務署計劃利用無人船喺其他水塘取樣,例如萬宜水庫,並繼續提升系統智能,令無人船可根據實時水質數據,例如當發現水塘某位置葉綠素讀數較高時,自動提升監測點密度,以收集更多數據,讓工作人員更詳細分析水藻數量。

相關字詞﹕無人船 水務署

上 / 下一篇新聞