港聞

港聞二

【Emily】評羅致光勞工政策 羅致光話中間偏左

【明報專訊】勞福局長羅致光近日言論惹火,談及要外傭打新冠疫苗時一句「佢(外傭)可以選擇唔喺香港做嘢」,惹嚟欺負弱勢工人嘅評論。羅致光噚日喺網誌力銷今屆政府勞福方面嘅成績,再爆金句,話自己「在勞工政策屬於中間偏左,只是左邊的認為我偏右,右邊的認為我偏左」。

話左傾嘅認為佢右 右傾嘅嫌佢左

羅致光喺勞動節翌日(5月2日)刊出網誌,拋出「偏向勞工還是偏向商界」嘅題目嚟討論。佢話2017年上任之初,多次公開講勞工政策「應稍為偏向基層勞工」,又話佢具社福界背景,所以有數名代表工商界議員都表達擔憂,擔心勞工及福利局變成「勞工福利局」。佢又解畫,話自己喺勞工政策上屬「中間偏左」,只係左傾嘅人認為佢右,右傾嘅嫌佢太左。

羅致光舉例,話有幾項工作會畀勞工界批評偏向商界,但同時又畀商界批評係向商界開刀,包括增加法定產假同設立法定侍產假、提高職安健法例最高罰則等。

佢又交代幾項工作,話現時每年法定假日(勞工假)12日,公眾假期17日,政府修例分階段增加勞工假,目標今年中完成立法,及時公布明年假日安排。至於最具爭議嘅取消強積金「對冲」,目標仍然係喺本屆政府內完成立法工作。

相關字詞﹕外傭 勞工假期 強積金對沖 羅致光

上 / 下一篇新聞