港聞

港聞二

【Emily】員工打針有獎 譽宴老闆否認利誘 講真,「𡃁仔畀人利誘出嚟掟汽油彈就有」

【明報專訊】食肆如果想獲放寬經營限制,例如6人一枱、開到午夜12點,政府要求全部員工最少要打咗第一針。職工盟總幹事蒙兆達噚日喺《城市論壇》批評呢個綑綁政策嘅做法令餐飲業員工為保飯碗被迫打針,又不滿有飲食業界助紂為虐,例如譽宴集團以停工同獎金威迫利誘員工打針。譽宴集團主席張家豪就話,「唔係咁低能囉,1000蚊可以利誘佢,講真,嗰班𡃁仔畀人利誘出嚟掟汽油彈就有」,言論暗諷有前年反修例示威者收受利益。

張家豪話七成員工「自願」打針

蒙兆達質疑點知自願

張家豪聲稱,佢哋七成員工係「自願」打針,三成就有醫生紙唔使打,最後無人要停工,打完針仲有獎金。張家豪當面對住蒙兆達講,「我公司同事好憎你個工會」。

蒙兆達質疑,張家豪點知員工係咪「自願」;節目主持人蘇敬恆又問到,會唔會有員工為咗獎金打針?張家豪就話,「如果真係怕死,你畀1萬蚊佢都唔會打,1000蚊可以收買到人?我真係唔信」。

蒙兆達認為,打咗同無打疫苗嘅員工唔應該喺福利上有差別待遇,或構成歧視。工聯會旗下飲食業職工總會榮譽會長郭宏興就話,如果唔適合打針,可以去寫醫生紙;自己唔想打,就去唔使打針嘅食肆做,認為「如果你係能幹嘅工友,市場就需要」。

上 / 下一篇新聞