港聞

港聞二

【Emily】修例提選票不需對摺 謝偉俊:多咗

【明報專訊】建制派謝偉俊近日頻頻喺修改選舉制度嘅立法會法案委員會提問,噚日喺會上就問到,當局預計日後選票尺寸比以往細,所以就喺條例提到唔需要對摺,佢質疑立例有冇需要講得咁細,如果張選票真係摺咗咁又會點,「寫到咁死,點樣摺張票、摺唔摺張票都要講到咁實」,反問係咪做得太多。

政制及內地事務局首席助理秘書長楊樂詩回應話,其實票站都有工作人員幫助選民,將選票合適地放入投票箱。謝偉俊追問如果摺咗張選票係咪有效,楊就話只要投票意向能清晰表達都係有效。

謝偉俊形容自己有感而發,認為條例寫得太細,搞到政府人員處理修例時做得太辛苦。法案委員會主席、建制派「班長」廖長江都話有同感,笑言「不過都唔算寫得太死喇,佢冇指定你用左手或右手投票」。

相關字詞﹕愛國者治港 謝偉俊 選舉制度

上 / 下一篇新聞