港聞

港聞二

【Emily】黃文萱退公民黨 未打算宣誓

【明報專訊】公民黨再有區議員退黨,沙田區議員黃文萱噚日喺fb表示日前已退出公民黨,亦未有打算喺立法會通過宣誓修例後「完成政府僭建的聲明要求」。文萱向Emily透露,自己約一兩星期前退黨,主因係希望另謀出路,亦希望減低之後所講嘅嘢對公民黨員嘅影響。佢話應該會辭職,但亦希望履行責任,做到最後一刻,又話「我知道公民黨同樣在轉型中,相信未來定必會在光復路上再聚」。

文萱喺fb話,宣誓修例係要肅清「唔聽話」嘅區議員,亦為所有區議員下「緊箍咒」,佢自言辦事處內嘅文宣,除咗將「光復香港,時代革命」旗幟反轉倒向掛,基本上都無拆除,對宣誓不存僥倖之心,亦不願委曲求全。文萱話上任後體現到體制內能作為嘅空間已極小,佢認為剩低嘅功課,應該係探索體制外嘅空間。

相關字詞﹕宣誓 辭職 公民黨 區議員

上 / 下一篇新聞