港聞

港聞二

【Emily】張國鈞怪區會冇監察巴士服務 羅健熙:你有份通過加價

【明報專訊】南區區議會主席、民主黨羅健熙噚日喺facebook引述行會成員、民建聯張國鈞日前講南區巴士服務要改善、批評南區區議會冇盡力做好監察,羅反駁,問張國鈞「唔覺得自己精神分裂架咩?」話張國鈞係行會成員,有份通過巴士加價,然後走去賴區議會把關不力。

張國鈞fb日前提到,民建聯南區支部4月做嘅巴士服務問卷,顯示南區居民普遍對巴士服務不滿,話「不滿有關當局未有任何政策穩定巴士車費,而南區區議會更沒有盡力做好監察,令區議會功能完全失效,令市民在巴士服務此等重大民生事務失去保障,實在令人遺憾!」

行會3月批准巴士加價,張國鈞同Emily講,喺加價問題上無怪區議會,而係「不滿有關當局未有任何政策穩定巴士車費」。但佢就指摘南區區議會冇盡力監察,話講緊嘅係巴士班次等服務問題,呼籲羅健熙「做區議員要虛心聆聽意見,不要一聽到批評就失去理智」。

上 / 下一篇新聞