港聞

港聞二

【Emily】唐唐:有潮州朋友心理不平衡 潮屬未列「列明團體」 林鄭節目陳情

【明報專訊】選舉法例修改後,選委會將新增60席同鄉社團代表,但成立20年嘅香港潮屬社團總會未列「列明團體」,無代表做選民,一眾潮總領袖早前甚至上書特首陳情。江蘇社團總會會長、全國政協常委唐英年出席特首林鄭月娥主持嘅《選委界別分組面面觀》節目時,就笑言「我有啲潮州朋友少少心理不平衡,話點解潮州冇」。有潮總中人就向Emily講,現時選委會制度咁唔公平,潮屬無代表做選民,「心理不平衡係正常」。

開電視鳳凰衛視央視轉播

林太話自己都有好多潮州朋友,但政府做事有規矩,修例時要有相對客觀標準,只有省、直轄市或自治區嘅同鄉社團先可以躋身「列明團體」,呢個標準係按內地意見,雖然潮州好大,但就不屬上述3類。

林太主持嘅《選委界別分組面面觀》本身喺港台播放,每日兩集、每集播4次。呢個節目不但喺港台LOOP,林鄭噚日話,香港開電視、鳳凰衛視香港台、央視應用程式都主動提出要轉播;開電視節目表就顯示,將會喺晚上11點播出節目。

林太話試過一日直落做咗7場錄影,藝人汪明荃、食物及衛生局前局長高永文前日就喺特首辦同佢喜相逢,話大家仲約好咗6月要睇汪阿姐嘅演唱會。

相關字詞﹕選委界別分組面面觀 潮屬社團總會 同鄉社團 特首林鄭月娥

上 / 下一篇新聞