港聞

港聞二

【Emily】林鄭訪查毅超:唔好意思 攞你哋一席

【明報專訊】由特首林鄭月娥主持嘅港台電視節目《選委界別分組面面觀》噚日播出第三、四集,訪問香港科技園主席查毅超同全國青年聯合會副主席霍啟剛,節目同選委會有關,不過節目內容大部分都係講林太同受訪者嘅工作。林太同查毅超就講香港再工業化嘅前景,查話「唔係擦政府鞋」,但近三幾年有政府支持科學園發展幅度好大,3年前只有700間公司,𠵱家已有超過1000間,中午食晏難搵位到拍得住中環。霍啟剛就介紹,全國青聯中有94名係香港人,7名係內地駐香港朋友,各行各業都有。

與霍啟剛講起多哈亞運

林太喺訪問查毅超一集,最尾講番選委會,「唔好意思,攞咗你哋一個位走」,原本選委會「工業(一)」有18個席位,𠵱家只有17,但唔使擔心,因為個位係畀咗中小企業,相信好多係從事工業或工業加工,咁先達至廣泛代表性、均衡參與。

林太訪問霍啟剛時就講起15年前,一齊去多哈亞運會睇馬術場地。節目亦有機會畀霍啟剛講,佢好積極同啟德體育園對接,同體育界接觸,希望爭取大型活動來港舉辦。

相關字詞﹕選委會 霍啟剛 查毅超 修改選舉條例 林鄭月娥

上 / 下一篇新聞