港聞

港聞二

【Emily】「形容政治老闆為魔鬼」 張志剛:湯家驊合乎政治倫理?

【明報專訊】行政會議成員、資深大律師湯家驊(Ronny)前幾日受訪,撐特首林鄭月娥連任,引用英文諺語「The devil you know better than the devil you don't(熟悉的魔鬼較不熟悉的好)」。「魔鬼論」持續發酵,全國政協委員張志剛噚日喺本報撰文,話Ronny獲特首委任加入行會,「形容他的政治老闆為『魔鬼』,是否合乎政治倫理?」

張志剛進一步話,如果現任特首係「熟悉的魔鬼」,咁建制派內其他有力問鼎特首嘅人,係咪都係「不熟悉的魔鬼」?佢相信會有一大批有志之士否認。

湯家驊:識英文都明 非話林鄭

Ronny回覆Emily查詢時話,當然唔係話林太係魔鬼,「如果你識英文嘅話都會明白我講咩」。被問到點解認為林太係「最開放嘅特首」,Ronny解釋,林太上任之初,曾經邀請民主派加入政府,「佢邀請我入行會都係同一個道理,你可以話我唔係民主派,但當我進入行會時,我肯定唔係建制派」。

就張志剛嘅文章,Ronny話尊重佢有唔同意見,唔會同對方爭論。

相關字詞﹕特首林鄭月娥 湯家驊 張志剛

上 / 下一篇新聞