港聞

港聞二

【Emily】聶德權函公僕 話有義務打針

【明報專訊】政府推出新冠病毒疫苗接種計劃兩個月,目前有約13%合資格市民接種第一劑疫苗,要達至群體免疫,仍有一段頗長距離。政府就用唔同方法希望市民打針,其中公務員事務局長聶德權噚日去信公務員,話公務員作為服務市民嘅團隊,「無論在滿足社會大眾期望或保障同事和服務受眾健康方面,都有義務主動接種疫苗」,除非身體狀况不允許,佢都希望同事盡快打針,協力消減疫情死灰復燃嘅風險。

聶德權喺信中提到,已請部門首長配合,便利公務員喺上班時間接種;如有需要,接種後亦可申請假期休息,形容事不宜遲,愈早接種可以愈早獲得有效保護,社會亦能更快建立免疫屏障。

已請部門首長配合

政府班子早前都係打科興疫苗,聶德權嘅信就無提及科興,但話政府計劃安排接種中心運作至9月底,打復必泰疫苗須喺8月底前打第一針,先可以確保9月底完成第二劑,表明接種名額有限,「大家務必立即行動,盡快預約,珍惜這得來不易的機會」。

相關字詞﹕公務員 復必泰疫苗 疫苗接種計劃 聶德權

上 / 下一篇新聞