港聞

港聞二

【Emily】青年自薦可申請 5月尾截止

【明報專訊】政府推行嘅「青年委員自薦計劃」(自薦計劃)嚟到第四期招募,話今次開放15個委員會畀年輕人揀選申請加入,每個委員會有兩個委任名額,年齡介乎18至35歲者可自薦加入。今次開放嘅委員會,包括保育歷史建築諮詢委員會、廉政公署社區關係市民諮詢委員會等,仲有一個叫做「中文界面諮詢委員會」,話職能係向副政府資訊科技總監提供意見,包括就協調香港各界人士有關本地中文電腦用字嘅需求提出意見。

民政事務局話,至今透過計劃直接或間接獲委任至諮詢及法定組織嘅青年擔任約400個職位,佔諮詢及法定組織青年成員嘅整體比例,亦從2017年嘅7.8%上升至現時13.7%,逐步趨向本屆政府訂下嘅15%目標;又話過去4次招募(即「青年委員自薦試行計劃」及第一至三期「自薦計劃」)共接獲逾5300份申請。

申請者表格可在民政事務局網頁(www.hab.gov.hk)下載,申請人要以文字(不多於600字)或影片、錄音(不長於3分鐘),講吓自己點解適合。5月26日截止申請,政府評審工作會於第四季完成。

相關字詞﹕青年政策 青年委員自薦計劃

上 / 下一篇新聞