港聞

港聞二

【Emily】民記領導換屆 「積極參與管治」 李慧琼連任主席 副秘5變1

【明報專訊】民建聯噚日選出新一屆領導層,李慧琼(Starry)連任黨主席,盧文端連任監委會主席,其他成員與上屆相若,但副秘書長就由5人減少至1人,只有葉傲冬繼續獲委任。民記現時喺立法會有13席,Starry話該黨將會積極參選及參與管治,雖然目前仲研究緊選舉部署,但希望喺日後90個立法會議席中,爭取比𠵱家多嘅席位。佢表明唔會放鬆地區工作,但要與不同界別建立更廣泛、穩固嘅聯繫,以更全面同均衡咁反映社會不同利益。

加強政策倡議

盼爭更多立會議席

民建聯噚日嘅背景板印上「積極參與管治 推動社會變革」,Starry指推動社會變革係民建聯嘅首務,黨內原有嘅政策委員會,將會提升為政策倡議委員會,作為政策決策核心;另外會設立政策顧問團,邀請黨內外資深人士參與,協助委員會嘅工作。

Starry話,民建聯仲會伙拍民間智庫,吸取民間智慧,爭取政府採納政策,日後議員嘅分工都會唔同,部分會負責政策倡議工作,部分會負責地區工作,鞏固社區聯繫。

民建聯近日提出「變革香港」口號,Starry話新一屆領導層將帶領政黨迎接新時代。佢認為香港嘅政治局面已恢復穩定,應集中精力處理深層次矛盾,發展經濟、改善民生。明年係民建聯建黨30周年,Starry話準備更新政黨宣言,確立更清晰嘅政策論述同主張,推動政府有效解決社會矛盾。

相關字詞﹕立法會選舉 李慧琼 民建聯

上 / 下一篇新聞