港聞

港聞二

【Emily】梁振英話聽聞唔選 教協:未有決定

【明報專訊】立法會選舉12月舉行,主要泛民團體未決定係咪參選。全國政協副主席梁振英噚日突然喺facebook話,聽聞教協前日開會員大會,決定唔派人參選嚟緊嘅立法會。教協總幹事沈偉男回覆Emily話,前日無討論過有關議程,教協未就參選與否達成決定。

唔使現時傾 會長撤回相關議程

梁振英喺facebook話,「參選不參選,撇撇脫脫總是好事」,叫人千祈唔好學民主黨「進退失據」。沈偉男話,教協過往喺立法會選舉前嘅會員大會上,會有議程討論係咪動用會內經費作為選舉開支,以符合有關工會條例,但前日會長馮偉華撤回相關議程,因為覺得唔需要喺現階段討論,畢竟選舉年尾先舉行。沈偉男話,喺新嘅選舉制度下,參唔參選係大事,要取得會員授權,有需要時可召開特別會員大會處理。民主派去年11月總辭前,時任教育界議員為教協副會長葉建源。

民主黨月初舉行交流會,主席羅健熙會後話參唔參選對民主黨未來好大影響,基本共識係交由會員大會決定,估計最遲會喺9月選委會選舉前開黨員大會。

相關字詞﹕民主黨 選舉制度 教協 立法會選舉 梁振英

上 / 下一篇新聞