港聞

港聞二

【Emily】海關犬消防犬首「相睇」繁殖

【明報專訊】要發展成愛侶,人有「相睇」,原來狗都有「相睇」。海關同消防首次合作繁殖工作犬,狗爸係消防搜救犬Jack,狗媽係海關緝毒犬Casa,兩隻都係史賓格跳犬。消防處話畀Emily知,兩犬初次見面「相睇」時,Jack比較怕醜,領犬員花咗唔少力氣幫佢哋培養感情,後來先至關係融洽,繁殖出6隻小寶寶。

幼犬寶寶今年農曆大年初一出世,改名都花足心思,分別叫Farris、Uma、Taco、Umi、Raisa和Effie,各犬首個字母拼起嚟就係「FUTURE」(未來);將來4隻寶寶會分配畀海關,2隻畀消防。幼犬現接受遊戲模式基礎訓練,滿1歲就轉為正規訓練,通過考核就可以成為海關搜查犬同消防搜救犬。

海外採購訓練停 工作犬需求殷

海關搜查犬課監督馬少芳話,新冠疫情下,停止派員赴海外採購犬隻同訓練,但工作犬需求殷切,所以決定同消防合作繁殖,期望搜查犬協助緝毒同搵爆炸品等。佢又話,近年有非法槍械流入本港,特別係槍械組件,預計今年底推出首批槍械搜查犬,物色緊適合嘅搜查犬同領犬員。高級消防隊長羅文傑話,市民近年鍾意山野活動,山野意外較以往頻繁,希望重點培訓新搜救犬協助救援同尋找失蹤市民。

相關字詞﹕搜查犬 消防 海關 史賓格跳犬 搜救犬 緝毒犬 工作犬

上 / 下一篇新聞