港聞

港聞二

【Emily】審法援更新系統撥款 建制鬧夏博義攬炒派

【明報專訊】立法會財委會噚日審議政府申請約7907萬元,以更新法律援助署個案管理等相關查詢系統,多個建制派發言時借題發揮,除批評法援常被濫用,工聯會陸頌雄引述反修例「爆眼女」案件,法援署批出法援請大律師公會主席夏博義去打官司,話夏博義其實都係「攬炒派一份子」,認為決定批出法援所諮詢嘅獨立大律師法律意見,「(同夏博義)有相同偏見、立場,去益夏博義繼續打呢啲官司」。

話批法援「益」夏博義打官司

陸頌雄發言時先質疑「爆眼女」呢件事,話如果真係因警方行動令佢爆眼,該份醫療報告又點會遮遮掩掩。佢最後先講番主題,問個案管理系統有冇方法對案情審查有幫忙,認為可用大數據、過去歷史同案例,由法援署決定呢啲案件有冇得打,而唔係額外畀錢大狀做獨立法律意見。

法援署長鄺寶昌話,呢個系統可做到加強資料庫,會收集類似案件法庭點判、之前取得嘅專家、大律師意見,將來有類似申請系統可以好快搵到,令將來處理案件嘅律師喺決定案件有冇理據時快好多。佢話如案件牽涉司法覆核,現時法庭未有案例,每個申請都會搵獨立大律師意見再作最終決定。

相關字詞﹕陸頌雄 法援 司法機構 夏博義 財委會

上 / 下一篇新聞