港聞

港聞二

【Emily】公民黨人貼中學舊相 為DSE生打氣

【明報專訊】中學文憑試(DSE)噚日首日開考,有民主派喺facebook貼出自己嘅中學學生相,為考生打氣。公民黨秘書長梁嘉善(Jessica)係舊制會考生,佢話當年為咗溫書,連年度盛事——聯校聖誕舞會都無去;同其他同學討論隔籬男校嘅男仔時,都會談及對方嘅成績。Jessica鼓勵今屆考生盡力考完就得,「無論將來如何,最緊要做個頂天立地嘅香港人」。

公民黨主席梁家傑都post咗一張黑白校服相,當年傑哥身穿西裝校服,戴住副黑膠框眼鏡,企喺講台發言;網民留言笑少年傑哥好「老積」。該黨沙田區議員黃文萱出相之餘亦話,知道今屆考生非常辛苦,中四中五時遇上社會運動,中六又面對疫情,佢話DSE可能係人生第一個真正難關,但絕對唔係最後一個,寄語考生唔需要太緊張,努力做好就夠。

另一沙田區議員陳運通就話,如果附近考生無地方溫書,佢辦事處有電腦有枱櫈,都適合做自修室,仲話考生出示准考證,佢會送一盒口罩。

相關字詞﹕成績 民主派

上 / 下一篇新聞