港聞

港聞二

【Emily】唔認入袁彌昌新平台 張炳良呂大樂:只係食過飯

【明報專訊】選舉制度大變,近日有傳媒報道,上年加入田北俊牽頭嘅「希望聯盟」、打中間派旗號出選立法會嘅學者袁彌昌有新搞作,正籌組學者平台,計劃向政府提出政策倡議同意見,透露8名成員包括運輸及房屋局前局長張炳良、教大副校長呂大樂等。不過,張炳良同呂大樂回覆Emily時否認消息,話根本無加入過平台,只係幾個人食過一餐飯。

袁彌昌話有8名成員

張炳良寫詩回應傳聞:不淌渾水

張炳良話,佢哋曾經喺飯局閒談,但距離搞一個認真嘅平台仍然好遠,自己亦無計劃加入。張炳良噚日更喺facebook出post,寫咗一首詩回應傳聞:「當前香港,巨變關頭;逆順難料,需時沉澱;整理思路,堅定信念;立足四方,不淌渾水」。

港大政治與公共行政學系榮譽講師袁彌昌早前接受網媒「香港01」訪問,話選舉制度更改後,擔心日後只剩下建制派一把聲音,希望集中學術同評論界力量提出意見,正籌組學者平台。佢當時話平台尚未命名,成員只係「碰頭」一次,目前仍處於初步階段。至於目前有無參選計劃,袁彌昌話取得選委會5界別提名嘅難度幾大,佢會先評估勝算。

相關字詞﹕選舉制度 袁彌昌 張炳良

上 / 下一篇新聞