港聞

港聞二

【Emily】謝偉俊話「製造混亂」 美芬要求收番

【明報專訊】建制派謝偉俊近日言論出位,評論其他議員時,往往引嚟嘩然。立法會噚日召開有關修改選舉制度嘅法案委員會,經民聯梁美芬問到選委可唔可以跨區提名直選候選人嘅問題,點知畀謝偉俊話佢嘅提問「製造混亂」,搞到美芬要求對方「收回言論」。

源於張宇人話畀美芬「混淆咗」

繼政制及內地事務局長曾國衞、建制派「班長」廖長江畀謝偉俊喺會上公開批評後,梁美芬噚日再同謝偉俊「擦出火花」。話說梁美芬喺會上問完問題後,自由黨張宇人追問,提及佢「正話畀梁美芬嘅問題混淆咗」,要求政府澄清。點知謝偉俊發言時,直接話「張宇人議員嘅問題係建基於梁美芬製造嘅混亂,(所以)佢先問嘅」。

梁美芬聞言忍唔住撳掣要求回應,「謝偉俊議員對我啲提問通常情有獨鍾,但係佢咁大頂帽,話呢個混亂係我製造出嚟,我希望佢收番(言論)……因為平時時間有限,我就唔回應佢,但係如果太過分,話呢個混亂係我嘅問題問出嚟,係絕對唔恰當」,強調討論有價值,唔應該貶低其他議員嘅提問。

主持會議嘅委員會副主席張國鈞就打圓場,話謝偉俊應該唔係咁嘅意思,而係話議員理解條文有混亂,叫雙方爭議到此為止。

相關字詞﹕選舉制度 立法會 謝偉俊 梁美芬

上 / 下一篇新聞