港聞

港聞二

【Emily】觀塘音樂噴泉啟用 市民:上上落落唔特別

【明報專訊】造價5000萬元嘅觀塘海濱音樂噴泉噚日啟用,下晝1點半有首場歷時約半小時表演,近百人圍觀,亦有小朋友喺嬉水區玩水。

話造價太貴 「三折就值啲」

住喺附近嘅陳先生,噚日帶埋外孫女到場玩水同睇表演,陳先生形容噴泉表演「普通」,話過去睇過唔同噴泉表演,「有啲噴到好高,有啲有花式,呢個只係上上落落,唔太複雜及特別」。對於噴泉造價5000萬元,佢話「打個三折、1500萬就值啲,5000萬都貴」。

有上班族趁午飯時間睇表演,話因為好奇先嚟睇,又覺得尖沙嘴星光大道嘅水上音樂噴泉匯演較好睇。

音樂噴泉兩旁有3個嬉水區,李太噚日帶埋仔女去玩水,佢話阿仔喺附近返學,日日都經過海濱公園,認為嬉水區隔籬就有草地唔易跣親,而原本要去到東涌、迪士尼等先有得玩,𠵱家屋企附近就有,非常方便。

現任區議員上任時曾否決起音樂噴泉,觀塘區議員鄭景陽批評噴泉對象小眾,認為5000萬元可以用喺其他更有公眾利益嘅事上,例如醫療設備。佢表明本屆區議會唔會支持用區議會撥款做維修保養。康文署發言人話,音樂噴泉每年維修保養費約100萬元,由康文署支付。

相關字詞﹕觀塘海濱音樂噴泉

上 / 下一篇新聞