港聞

港聞二

【Emily】沙螺洞現濕地闊裂葉羊蹄甲 香港首見

【明報專訊】「蜻蜓天堂」沙螺洞濕地數十年嚟不斷被破壞,政府2017年以非原址換地方式,向地主換取當地具高生態價值嘅私人土地業權,並由綠色力量保育。綠色力量噚日公布,早前發現闊裂葉羊蹄甲(Bauhinia apertilobata),屬香港首次記錄。

綠色力量教育及項目經理鍾翠珊話,去年6月喺當地做生態調查期間,喺風水林旁邊發現呢種植物。佢話呢種植物攀纏大樹,向上往陽光照射到嘅高處生長,經仔細分析花朵特徵,最終確認其身分。

與洋紫荊同屬 分佈閩粵等地

闊裂葉羊蹄甲係蘇木科之中嘅羊蹄甲屬(Bauhinia)植物,全球約有300種,主要分佈喺熱帶同亞熱帶,約30種分佈喺中國各地,香港錄得其中6種同另一變種,包括香港市花洋紫荊。至於闊裂葉羊蹄甲,根據《中國植物誌》,分佈福建、江西、廣東及廣西一帶,之前香港一直未有官方紀錄。

經復育嘅沙螺洞,生態逐步恢復,綠色力量早前調查亦喺沙螺洞發現多種稀有植物,包括喺人工沼澤發現稀有程度屬「易危」嘅「水蕨」,同喺生態池塘發現嘅「尖瓣花」,亦屬本地罕見物種。

相關字詞﹕闊裂葉羊蹄甲

上 / 下一篇新聞