港聞

港聞二

【Emily】上任一年 發信讚財庫局「多產」 許正宇申報妻擁星洲自住單位

【明報專訊】官場去年4月「大地震」換局長,5名新局長上任至今一年,Emily翻查行會成員利益登記冊,發現財經事務及庫務局長許正宇喺今個月14日加入申報項目,話太太同家人聯權擁有一個新加坡住宅單位自用。

許正宇正出席博鰲亞洲論壇年會,佢向財庫局同事發信回顧一年工作,形容過去一年財庫局喺立法會可以話係最「多產」嘅政策局之一,喺大會通過7條草案,本屆立會完結前仲有6、7項草案或附屬法例要處理,充滿挑戰;又話自己接受咗接近60次媒體或業界組織訪問、見傳媒或出席記者會。佢希望同同事繼續保有勇氣、鬥心,尤其喺選舉制度修改後,一齊同心做事,服務香港、市民。

聶德權:過去一年充實有挑戰性

創新及科技局長薛永恒形容過去一年「極不容易」,但初心不忘,話同團隊本着迎難而上精神,致力做好有關工作,希望創科產業、人才能夠脫穎而出,推動香港向前。佢回顧過去一年接受69次傳媒訪問,亦不停同業界會面,包括會見立法會不同黨派共16次,話希望同各方好友、持份者加強協作,緊密溝通,共同培育人才,為「創科之橋」一齊努力。

由政制局轉位到公務員事務局嘅聶德權喺fb上載對住寫有「護己護人」蛋糕做心心手勢嘅相,話過去一年「十分充實,十分具挑戰性,亦十分有意義!」

上 / 下一篇新聞