港聞

港聞二

【Emily】市民申覆核議員「二次當選」 41建制成答辯人

【明報專訊】全國人大常委會去年8月作《決定》,延長第六屆立法會繼續履職不少於一年,至第七屆立法會選舉為止,民主派總辭;41名建制派議員、醫學界陳沛然同熱血公民鄭松泰延任。事隔一排,市民沈泰鋒月初入稟司法覆核,要求將所有建制派議員同陳沛然列為答辯人,質疑佢哋喺去年7月18日起、即原任期完結後,無權以立法會議員身分行事;仲話佢哋未經選舉就「自動繼續『二次當選』」,違反《基本法》。沈入稟要求禁止42名議員以立會議員身分行事,同禁止第六屆立法會繼續審議議案。

民建聯副主席陳克勤同新民黨主席葉劉淑儀都係答辯人。克勤話佢第一次被人告,透露第一答辯人、立法會主席梁君彥搵緊法律顧問了解應該點做。葉太話相信入稟唔會成功,話自己首次因為議員身分被人告。至於沈泰鋒,有報道話佢喺律師行擔任訴訟主任;曾參加2015年區議會選舉,挑戰民建聯主席李慧琼失敗,有本土派背景。

相關字詞﹕梁君彥 押後立法會選舉 立法會 立法會延任

上 / 下一篇新聞