港聞

港聞二

【Emily】竹林貼紙蓋「連儂牆」 區議員嘆粉飾太平

【明報專訊】2019年反修例示威告一段落,當時嘅痕迹亦逐漸消失。近日多區當日有「連儂牆」嘅地方,都被貼上竹林貼紙,好似粉嶺馬會道迴旋處下嘅行人隧道、觀塘道行人隧道等。中西區區議員葉錦龍(Sam)噚日喺facebook出文,話港鐵香港大學站外嘅兩條橋柱原本係一片「連儂牆」,路政署近日自行替橋柱做油漆翻新,油漆仲要係防噴漆、防黏貼,然後再包多層竹枝圖案牆紙喺上面。阿Sam就覺得,「令人不禁感嘆當局粉飾太平真係急不及待」。

話事前未獲通知 非區議會撥款

阿Sam話山道一帶有十幾條橋柱,大部分被畫上壁畫超過10年,現有唔少磨損甩色,中西區區議會早前通過壁畫及樓梯畫翻新工程,但唔包括「連儂牆」位置,因為嗰兩條橋柱無壁畫。路政署用「牆紙包柱」,阿Sam話事前無得到通知,工程亦非由區議會撥款,佢話項目影響區內景觀,亦令街坊擔心其他橋柱會被如法炮製,指呢種裝飾都幾無厘頭。

阿Sam形容,「連儂牆」位置曾經歷一場「攻防戰」,因為反修例期間有人喺上面黏紙條,但「親中嘅人」就用雪油覆蓋,當時為免街坊行過時整污糟自己,佢仲要通知政府部門清理污漬;𠵱家塵埃落定,當局直接用「牆紙包柱」,不過有網民就覺得設計「好核突」。

相關字詞﹕中西區區議會 壁畫 民政事務處 葉錦龍

上 / 下一篇新聞