港聞

港聞二

【Emily】林太:盼港青去海南食海南雞飯 陳沛然抽水:瑞士雞翼來自瑞士

【明報專訊】海南雞飯到底係咪來自海南?噚日社交媒體突然熱烈討論其起源,皆因特首林鄭月娥(圖)出席博鰲亞洲論壇後,喺facebook透露海南省領導向佢主動提出,喺海南為香港青年提供就業創業機會,令佢好感動,希望好快見到香港青年去海南實習、創業,「享受椰林樹影和港人喜愛的海南雞飯!」

感動海南省主動為港青提供機會

帖文一出,有網民提林太話海南雞飯係星馬菜式,有人取笑佢「幾時去波羅的海食個菠蘿包」、「鑽石山唔通出產鑽石咩」。連醫學界立法會議員陳沛然都參一腳,話「揚州炒飯來自揚州,福建炒飯來自福建;廈門炒米來自廈門,上海粗炒來自上海,葡國雞飯來自葡國,瑞士雞翼來自瑞士。自古以來,一定係,除非唔係」,話去海南島食海南雞飯十分合理。

咁到底海南雞飯係邊度名菜?「天天海南雞飯」行政總裁Charles同Emily講,海南雞飯的確係出自海南,但係去到外國先出名。佢解釋,當年好多海南人去星馬一帶做苦力,煮海南雞飯愈嚟愈出色,結果變成星馬菜式。

大廚:源自海南外國成名 做法有別星馬

佢話海南雞飯喺海南都係名菜,但做法有別,舉例星馬會浸冰水、海南就主要熱食,加上海南用嘅係食椰子大、皮最薄嘅文昌雞,新加坡就冇文昌雞,所以好多海南人都話,其實新加坡嘅海南雞飯先唔正宗喎。

相關字詞﹕海南雞飯 海南 特首林鄭月娥

上 / 下一篇新聞