港聞

港聞二

【Emily】還押中譚凱邦 辭任荃灣區議員

【明報專訊】再有涉及民主派35+初選案而在囚嘅區議員辭職。荃灣馬灣嘅譚凱邦(Roy)嘅facebook公布,話呢一個多月來雖然盡力跟進區議會職務,但還押及復工無期,佢無法接受自己未能親自為馬灣、荃灣居民服務,有見及此,宣布辭去荃灣區議員一職。

阿Roy噚日向馬灣居民發出最後一份工作報告,話當初與馬灣結緣,始於機場籌建第三條跑道,而馬灣係飛機航線必經之路,佢同環保團體一齊關注呢項議題,反對機場第三跑道工程。佢話感謝馬灣居民同行,有幸曾經做過區議員。環團出身嘅佢又話,相信佢無論喺乜嘢崗位,仍然可以為環保出力,回報社會及地球養育之恩。

另外,政府將要求區議員宣誓效忠,之前話過唔會宣誓嘅北區區議員袁浩倫公布,已經向民政總署遞交辭任信,生效日期為6月1日。佢話希望大家都明白,「係政府洗(使)橫手加插一啲野(嘢)入黎,情況就有如兩間商舖一直有生意來往,但其中一方加插條款而無經另一方同意」,指面對橫蠻做法,佢「不會宣誓」。佢喺結語話,「點都好,香港人加油」。

相關字詞﹕區議員宣誓 袁浩倫 港區國安法 民主派初選 35+大搜捕 譚凱邦

上 / 下一篇新聞