港聞

港聞二

【Emily】公僕工會:要求宣誓後萬宗「篤背脊」

【明報專訊】政府要求公務員宣誓同簽署聲明,有129個公務員拒簽。公務員工會聯合會總幹事梁籌庭噚日接受商台訪問,形容佢哋「好勇」,話自從政府推出宣誓要求,公務員篤背脊文化「成行成市」,據悉至少有過萬宗,有新入職公務員更畀同事截取入職前嘅網上言論圖片「篤灰」。

新人入職前講政治 被截圖投訴

梁籌庭噚日講其中一個被「篤灰」案例,話有新入職兩個月嘅公務員,未入職前曾經喺社交平台講過一啲政治上嘅嘢,點知被人截圖投訴,輾轉下交咗畀公務員事務局處理。雖然最後個案唔成立,但佢就騰雞咗兩個月,「食又食唔落,瞓又瞓唔安」。

梁籌庭話,佢所屬部門𠵱家喺「入職班」都會提醒新人,最好第一時間刪晒社交平台所有嘢,茶餘飯後都唔好討論政治,「你唔知身邊邊啲係鬼」。佢話以前公務員講咩都得,只要無行動就可以,𠵱家就講都唔得,覺得好無奈。佢話曾向公務員事務局長聶德權反映篤背脊會令人心惶惶,但對方無回應,覺得局方應該修訂指引,「有條底線畀大家,唔好死得不明不白」。

公務員局:無備存投訴數字

公務員事務局回應,話無備存有關整體公務員嘅投訴數字,近月該局接獲嘅投訴無顯著增加,無證據顯示喺公務員宣誓或作出聲明後收到有所謂超過1萬宗涉及公務員嘅投訴。

相關字詞﹕公務員工會聯合會 梁籌庭 公務員宣誓 公務員簽聲明 公務員事務局

上 / 下一篇新聞