港聞

港聞二

【Emily】初選案還押中 李嘉達辭任區議員

【明報專訊】民主派立選初選案仍有36人還押中,當中唔少人都係區議員。繼新民主同盟范國威、民主黨林卓廷之後,觀塘區議員李嘉達都辭去區議員職務,民政事務總署噚日確認已接獲其辭職通知。觀塘區議會主席蔡澤鴻同Emily講,早前已聽聞李嘉達有意辭職,主因係未能履行職務,噚日佢接獲民政專員通知,李嘉達已交辭職信。觀塘區議會網頁就顯示佢嘅任期直至4月18日、即係前日。

區議員李煒林退出公民黨

蔡澤鴻話,李嘉達嘅辦事處已經結束營運,日後如果街坊有求助,觀塘其他區議員都會協助。佢透露今個月都探過李嘉達,形容對方精神OK、有每日讀報,又透露佢每次見人前都會先冲涼,希望精神啲見人,唔想被人覺得好頹。

此外,觀塘區議員李煒林噚日喺facebook宣布退出公民黨,佢話感謝公民黨過去幾年嘅支援同提攜,作為議員,會一如既往着力專注經濟民生地區議題。近月有多名區議員先後退出公民黨,另一觀塘區議員李軍澤上周二(13日)亦以「與公民黨的意見大相逕庭」為由宣布退黨;另外畢東尼雖然冇退黨,但就宣布辭任區議員、退出香港政壇。

相關字詞﹕民主派初選案 區議員

上 / 下一篇新聞