港聞

港聞二

【Emily】話以往忍住 Paul否認刻意扮反對派

【明報專訊】民主派去年11月總辭後,議會內絕大部分都係建制派議員。建制派謝偉俊(Paul)近期踴躍發言,批評官員時毫不留情,曾當面斥責政制及內地事務局長曾國衞「唔熟書」。Paul噚日接受now新聞台節目《大鳴大放》訪問,解釋唔係刻意扮演反對派,只係過往民主派仲喺議會時,建制派會「忍氣吞聲」,以免「火上加油」。

Paul話以前唔想畀機會民主派拉布,又或者兩邊都火花四濺時,會令事情無辦法完成,「(建制派)好多時候係忍氣吞聲,唔講嘢、唔出聲」;但佢認為民主派總辭後,議會已經冇咗搞事嘅聲音同行為,議政空間增多,「有啲肯願意花時間,或者有能力、較肯講心底話嘅議員就可以多講自己嘅嘢」。

下屆90議員

話每人發言1分鐘唔係合理數字

Paul身兼議事規則委員會主席,佢話本屆立法會任期結束前或再修改議事規則,包括限制委員會成員人數,以提高議政效率。下屆立法會有90個議員,Paul話如果一個委員會有69個議員加入,每人發言1分鐘,一轉都要69分鐘,認為唔係一個合理嘅數字。

相關字詞﹕反對派 民主派總辭 立法會 謝偉俊

上 / 下一篇新聞