港聞

港聞二

【Emily】獄中看《蘇軾傳》 阿人囑勿掛念

【明報專訊】支聯會主席李卓人因前年組織、參與「8.18流水式集會」、同年8月31日參與遊行,被判入獄共14個月,佢嘅facebook發帖文,透露阿人入獄前已選訂咗《蘇軾傳》、Historic Speeches(歷史性演說)兩本書,太太鄧燕娥、戰友蒙兆達去探訪時已經送咗畀佢,又話佢精神唔錯,現時獨自隔離,因天雨未能外出,所以喺倉內踱步,每日兩餐一粥唔太難食,雖然第一晚瞓得唔太好,但腦海遊歷咗唔少地方幫助入睡。

帖文話一向習慣忙碌嘅阿人覺得無聊,希望快啲有紙筆寫信同記錄心情。阿人叮囑大家唔好記掛佢,又強調無論遭受乜嘢懲罰,都會繼續堅持集會言論自由,坐監亦無悔無憾,「燈在,人在,只要繼續堅持信念,我地就會看見希望」 。

吳敏兒驚喜轉到成百下呼拉圈

職工盟前主席吳敏兒(Carol)亦因初選案而還押逾月,職工盟喺fb上載Carol上月嘅獄中書信,佢話還押中最意外嘅事係竟然玩到呼拉圈,話喺外面時轉唔到5下,坐監就可轉到成百下,「我真係覺得有無搞錯?」Carol話已收到曾因佔中案被囚嘅陳健民著作《獄中書簡》,話睇咗覺得好平安,「這高牆是高,但我不管它有多高,它的高度不能限制我對香港的愛,也限制不了我對理想的追求」。

相關字詞﹕吳敏兒 職工盟 李卓人

上 / 下一篇新聞