港聞

港聞二

【Emily】獄中無得見親友上網 岑子杰話似返到小學

【明報專訊】民主派初選案尚有36人還押,沙田區議員趙柱幫、石威廉噚日去探社民連岑子杰(Jimmy)。趙引述Jimmy預計最少要坐3年監,現時已適應在囚生活,最慘係冇得同相熟親友接觸,同埋生活喺無互聯網嘅世界,好多資訊無法即時接收,有啲似返到小學嘅生活模式,又話預計涉初選案嘅區議員幾乎唔可能被接納宣誓,自己亦唔抱期望。

不滿收押所國安教育日無奏國歌

趙柱幫引述Jimmy話已經比好多還押嘅男手足幸福,「因為其他人要睇公仔紙J圖,而佢就睇囚友就可以」。前日係國家安全教育日,Jimmy唔滿意荔枝角收押所無奏國歌、升國旗,叫佢哋代為反映畀政府聽。早前沙田區議會影大合照,有人喺相中以彩虹旗代表Jimmy,Jimmy話非常喜歡。

至於已還押多時嘅人民力量譚得志(快必),佢嘅facebook上載帖文,透露社民連梁國雄(長毛)自言認識作家黃碧雲,問黃送本書畀快必好唔好,「快必話唔係民主黨嗰個(黃碧雲)喎,當時心諗係唔係呀,真係同佢咁熟,會送本書畀我?」點知早前喺探訪室度見到作家黃碧雲探長毛,快必好興奮同佢揮手打招呼。

快必又透露終於收到工資,換咗兩包麥精、兩包花生餅、4包芝士圈、4包麥餅。

相關字詞﹕譚得志 岑子杰 黃碧雲 區議員

上 / 下一篇新聞