港聞

港聞二

【Emily】教局:積極參與學校送免費遊學 參加基本法問答賽有着數

【明報專訊】教育局近年強調要加強學校嘅《憲法》、《基本法》同國家安全教育,局方噚日就致函中小學,邀請學生參加「第七屆《基本法》全港校際問答比賽」,仲出招「利誘」,話參加率高嘅中小學唔單止有獎攞,多人參加嘅學校,師生仲可以免費參加基本法學習團,到訪地點就未定。

比賽有小學組同中學組,分別畀高小同初中學生參加,初賽下個月喺網上舉行,參賽學生要喺15分鐘答30條題目。

教育局話,每組頭30間學生參與率最高嘅學校,會攞到「最積極參與學校獎」,當新冠疫情緩和後,局方會邀請相關學校推薦師生參加「進階《基本法》學習團」,費用由局方承擔。

參考資料加入國安教材

攞到「最積極參與學校獎」而且平均得分最高嘅5間中學同5間小學,除咗可以晉身決賽,教育局仲會邀請學校推薦學生,參加下學年喺內地舉行嘅「第六屆全國學生『學憲法講憲法』活動全國總決賽」,「以增加學生對國家《憲法》及《基本法》的認識,拓寬視野」。

教育局提供多項參考資料同網頁畀參賽學生準備。今屆問答比賽係《港區國安法》實施後第一次舉辦,局方為中小學生準備嘅參考資料,都加入咗當局就學校國家安全教育推出嘅學與教資源。

相關字詞﹕國安教育 中小學 基本法 憲法 教育局

上 / 下一篇新聞