港聞

港聞二

【Emily】與何秀蘭今判刑 李卓人:心靈海闊天空

【明報專訊】818流水集會案、831祈禱大遊行案今日判刑,兩案涉及多名資深民主派,包括支聯會主席李卓人、民主黨前主席楊森、創黨主席李柱銘等。其中,李卓人今日有兩案判刑,佢噚日喺facebook話,以往遊行時都會用「牢獄」做抗議道具,今次應該真係會入獄,佢只能希望同案其他被告唔使坐監,「身在牢獄,但心靈海闊天空!江湖再見!」

喺818案被判罪成嘅立法會前議員何秀蘭(Cyd),近日不斷製作書籤送畀好友,佢早前喺fb上載嘅書籤包括寫上「懷憂不喪志」、「歲月靜好」、「餘粗平安」等,仲話「餘粗平安」來自王羲之寄友人報平安手帖,香港潮語可譯為「過得okay喇」。Cyd噚晚喺fb話,判刑前做多幾張書籤,然後洗廚房洗廁所吸地,如常生活。佢話原本質疑自己係咪刻意遏抑憂慮,但有專業輔導嘅朋友為佢解難,原來佢心態唔錯,方向正確,「於是信心大增」。

Cyd趕製書籤 贈友「餘粗平安」

Cyd話即使肉身無自由,都可以保持期盼,有生活目標;朋友亦提醒佢一定要做運動,無論係輕鬆拉筋、或運用身體做阻力肌肉訓練,唔好畀身體慵懶。Cyd話希望港人懷抱希望,不斷學習增益,更加互助互愛,「黑暗總會過去」。

上 / 下一篇新聞