港聞

港聞二

【Emily】3月曾喺人民大會堂跌倒 中環西環出手 齊扶董生

【明報專訊】全國政協副主席董建華當年因「腳痛」辭任特首,今年3月北京兩會期間就喺人大會議開幕當日,喺人民大會堂內跌倒。佢噚日出席「全民國家安全教育日」開幕禮,其他嘉賓都有特別照顧佢,上落主禮台時,中聯辦主任駱惠寧、駐港國安公署署長鄭雁雄,政務司長張建宗同財政司長陳茂波主動出手攙扶。

慢步進場 少少一拐一拐

83歲嘅董生,上月喺人民大會堂跌倒,事後話無事,只係無留意腳下情况而絆倒。董生噚日出席「全民國家安全教育日」開幕禮時,進場時行得好慢,用兩分鐘先由會場嘅後方行到台前,其中左腳睇落無咩力,要右腳做主力腳咁行,顯得有少少一拐一拐。其他主禮嘉賓,例如特首林鄭月娥、駱惠寧、鄭雁雄都有就番董生,放慢步速。

台上表現精神 撩駱惠寧傾偈

活動期間,董生喺約20分鐘內,要兩次上台主禮同影大合照。第一次上台時,董生由兩名工作人員攙扶,落台時鄭雁雄主動上前扶董一臂,駱惠寧亦行前扶董另一臂。約10分鐘後,董生再上台,落台時原本喺董生右邊嘅陳茂波就兜過去左邊扶佢,張建宗就負責扶住董嘅左臂。

雖然董生上落台唔係咁自如,但佢表現得好精神,喺台上多次撩駱惠寧同林太傾偈。

相關字詞﹕陳茂波 鄭雁雄 駱惠寧 張建宗 董建華 全民國家安全教育日

上 / 下一篇新聞