港聞

港聞二

【Emily】中電E-Playground開幕 太陽能樹新派許願

【明報專訊】新冠病毒疫情令今年大埔林村許願節都要取消,中電近日就喺林村附近整咗個以電力工程、能源及環保為主題嘅室外遊樂園——「中電E-Playground」,仲設新派許願樹。噚日中電舉行開幕禮,環保局長黃錦星、中電主席毛嘉達及總裁蔣東強等,就將願望寫喺樹葉形嘅環保紙上,再掛上設有太陽能板嘅樹上。

黃錦星寫願望掛上許願樹,包括希望香港青年獎勵計劃日後可以舉辦更多關於氣候變化嘅活動、希望年輕人可從衣食住行四方面都做到低碳生活等。蔣東強就話,希望該處可啟發年輕一代對能源、環保節能及電力工程嘅興趣。

中電E-Playground位處林村港青年獎勵計劃賽馬會愛丁堡公爵訓練營內,設有不同主題嘅設施,包括融入太陽能及風能元素並以林村著名景點為題嘅「許願樹」;取材自中電天然氣輸送管道嘅「乒乓360」、以踏單車動能驅動風扇嘅「動力涼伴」等,畀參觀者了解發電、輸配電及供電。

中電E-Playground係為中學生而設嘅中電「校園工程師」教育項目主要活動,營地亦有STEM工作坊參加。學校及公眾都可預約參觀。

相關字詞﹕香港青年獎勵計劃 中電 許願樹 林村

上 / 下一篇新聞